Հավելյալ տեղեկություն

Կենտրոնում կիրառվող հեղինակային մեթոդը պատկանում է փոխներգործուն ճանաչողական մեթոդների խմբին: Ուսումնական գործընթացի հիմքում ընկած է ակտիվ խոսքը, ինչն էլ խթանում է հաղորդակցային հմտությունը: Բառերի և խոսքի քերականական կառույցների մտապահումը իրականացվում է մի շարք հոգեբանական հնարների կիրառմամբ: Հոգեբանական մեխանիզմների ներառումը ուսուցման գործընթացում հնարավորում է խուսափել շարունակական ներքին թարգմանությունից, ինչը ներհատուկ է ավանդական ուսուցման մեթոդներին: Վերոնշյալ մեխանիզմներով ուսուցումը օտար լեզվով խոսքը դարձնում է գրեթե նույնքան բնական, որքան մայրենի լեզվի բնականությունն է:
Կենտրոնը հիմնադրվել է 1976 թվականին որպես փորձնական լաբորատորիա, Խաչատուր Աբովյանի անվան Հայկական Մանկավարժական Ինստիտուտի ռուսաց լեզվի ամբիոնին կից (Երևան, Հայաստան): Սկզբնական շրջանում այն անվանվել է Հայկական Հանրապետության Ինտենսիվ Մեթոդների Լաբորատորիա (ՀՀԻՄԼ): 1984թ-ին այն դարձավ ֆակուլտետ նույն ինստիտուտում: 1995 թ-ին այն առանձնացավ ինստիտուտից և գրանցվեց որպես «Լեզուների Տուն» ՍՊԸ (թարգմանաբար՝ «Domus Linguae»՝ Լեզուների Տուն):
1972թ-ին Հայաստանի Կրթության նախարարության խնդրանքով սկսեց ծրագրվել նոր մեթոդով աշխատանքները: Անհրաժեշտ էր ընտրել, ծրագրել անգլերեն լեզվի մի դասընթաց՝ գիտական հաստատությունների կրտսեր գիտաշխատողներին հնարավորինս կարճ ժամկետներում անգլերեն սովորեցնելու համար:
Ամենաարդյունավետ համակարգը համարվեց պրոֆեսոր Գ. Լազանովի կողմից առաջարկած համակարգը, որը հիմք դրեց մի շարք դպրոցների:
Դասավանդման գործնական աշխատանքը սկսվեց անգլերեն և ֆրանսերեն լեզուների առաջին փուլով` օգտագործելով պրոֆեսոր Ի.Յ. Շեխտերի մոդելը: Այն առաջարկվեց որպես խոսակցական դասընթաց` նախատեսված զբոսաշրջիկների համար:Փուլերն ունեցան հաջողություն
Ինչևէ, պարզ էր, որ փուլերի բովանդակությունը, որը լուծում էր խնդիրը զբոսաշրջիկների ուսուցման հարցում, չէր համապատասխանում այն մարդկանց պահանջներին, ովքեր նպատակ ունեին օգտագործել լեզուն աշխատանքում:
Հետևապես «Լեզուների տուն» կենտրոնի համար անհրաժեշտություն առաջացավ մշակել ինտենսիվ ուսուցման սեփական ռազմավարություն: Հրատապ դարձավ հասկանալ, թե ի՞նչ է նշանակում լեզվի տիրապետում կիրթ, գրագետ անհատի համար, ինչպե՞ս անցում կատարել կաղապարված արտահայտչամիջոցներից և արտահայտություններից սեփական մտքերի ազատ շարադրմանը և ինչպե՞ս դա անել արագ՝ չգտնվելով ուսումնասիրվող լեզվի սոցիոմշակութային միջավայրում:
Դասընթացը, որը մշակվեց կենտրոնի կողմից, իրականում բացառիկ է և լուծում է վերոշարադրված խնդիրները: Ուսուցման արդյունքում Ձեզ հասանելի է դառնում անկաշկանդ խոսքը՝ ձերբազատելով Ձեզ ներքին թարգմանությունից: Հնարավորություն ընձեռելով Ձեզ լինել լեզվի կրողը՝ ձևավորում է անկախ անգիտակցական խոսքային մեխանիզմներ: